利物浦喺冬季转会窗先声夺人，喺曼联嘴边抢走天才翼锋加普，不过呢位荷兰国脚加盟後表现差劲，4场比赛0入波0助攻，周六(21日)对车路士一仗7次射门得1次中龙，大批曼联球迷喺网上庆祝「逃过一劫」，「红军」名宿奥云亦话戥加普可怜。

加普以3,700万镑由燕豪芬转投利物浦後，4场赛事愈踢愈沉，对车仔一仗7次射门得1次中龙，未有过人纪录，7次对抗亦只系得1次成功，大批曼迷网上留言：「加普系荷兰版迪姆华拿，曼联逃过一劫」、「我知道佢只系踢4场，但佢喺呢4场一无是处」、「好彩曼联签唔到，佢系个独食怪」、「佢系高普8年来第1个签错嘅前锋」......

虽然被冠上「水货」之名，但利物浦名宿奥云亦为佢辩护：「讲真我戥佢可怜，佢加入一支好唔稳定嘅球队，佢嘅信心都被搾乾，睇得出加普非常努力，我肯定佢未来会被视为成功嘅收购，但呢一刻就算美斯加盟都唔会踢得好。」