过去一年经历重重波折嘅C朗拿度，周五(10日)喺沙特阿拉伯联赛威番铺，佢成功食出「大四喜」，带领艾纳斯作客4比0大胜艾维达，继续坐喺榜首位置。C朗今场独取4球後，生涯累积联赛入球数突破500球大关，呢位葡萄牙球星全场表现兴奋，似乎已重拾踢足球乐趣。

C朗加盟艾纳斯後，头3场赛事只入过1球12码，不过今仗表现非常醒神，21分钟突破越位禁区内抽入远柱，完半场前佢喺右路快放，单刀射成2比0；53分钟艾纳斯获得12码，C朗操刀完成帽子戏法，8分钟後C朗再次单刀，第1脚射门虽被扑出，但佢成功补射入网，率艾纳斯大派4蛋。

今场第1个入波，系C朗生涯累积第500个联赛入球，母会士砵亭亦发文祝贺佢达到呢个里程碑。今场系C朗历来第11次「大四喜」(其中2次入5球)，亦系佢连续第14季试过单场入3球或以上，虽然今仗系作客赛事，但全场球迷都一齐同C朗庆祝入波，佢完场後更罕有拎个波畀球证签名先带走。

C朗赛後喺社交网留言表示：「好开心可以入4球，而且喺1场稳固嘅胜仗中完成500个联赛入球里程碑！」艾纳斯主帅鲁迪加西亚亦表示：「C朗要时间适应新队友同比赛节奏，今场系美好嘅一仗，我对C朗嘅才华同适应力非常欣赏。」