英超近期连环爆出VAR错判丑闻，周四(16日)凌晨阿仙奴对曼城嘅榜首大战，球证问题自然成为焦点。最讽刺嘅系，丑闻球证之一嘅约翰布鲁克斯，原本被安排出任呢场「兵城战」嘅VAR球证，但系风头火势之下，英国职业裁判员公司(PGMOL)临时决定将佢踢走。

约翰布鲁克斯系上周白礼顿对水晶宫嘅VAR球证，当时白礼顿入波因越位被判诈胡，但约翰布鲁克斯画线嗰阵，「发鸡盲」忽略企最後嘅守将，搞到PGMOL要认错兼道歉。约翰布鲁克斯本身亦系阿仙奴对曼城嘅VAR球证，但赛会日前宣布更换人选，改由大衞古迪出任。

至於上轮因「唔记得画线」令阿仙奴失分嘅VAR球证李美臣，由於已经系今季第3次「证实」误判，据报PGMOL话事人韦比正考虑将佢炒鱿，PGMOL前任主席赫杰特表示：「李美臣系所有球证入面表现最差嗰个，佢唔应该再留喺度，球员踢得差都会被球会踢走，球证亦都应该一样。」