拉舒福特上仗对李斯特城起孖，近17仗交出16球3助攻，另外查顿辛祖归队後亦状态冒升，上场同样有波入，两位红魔锋将有咁好表现，奥脱福看台上球迷呼唤「麦卡菲」名字，原来佢哋讲紧今季新加盟嘅曼联前锋教练，「寸王」摩连奴昔日徒弟，福仔同辛祖有咁好表现，完全系佢功劳。

麦卡菲系曼联教练团新成员，专门提高前锋能力，佢系前南非国脚，球员时代踢过阿积士、切尔达、波图、布力般流浪同韦斯咸，其中效力波图期间赢过欧联冠军，当时主帅就系摩连奴，退役後担任教练，虽然45岁嘅佢身型渐逐发福有大肚腩，但呢啲唔重要，最重要系佢识得点样调教前锋。

曼联操练中，麦卡菲对福仔同辛祖进行一对一训练，改善佢哋嘅埋门技术，而且佢懂多国语言，能以英、荷、西、葡语沟通，有效地同球员交流，佢对福仔嘅调教好全面，包括改善头槌，传授经验，有机会时更加冷静等。

目前拉舒福特已累积攻入24球，超越个人於2019至20年球季最佳纪录22球，曼联官方社交媒体出帖祝贺，并留言「依家只系2月」，意思系佢仲可以将入球数字推高。