曼城前锋艾宁夏兰特今季光芒四射，各项赛事上阵31场入32球，不过呢位挪威新星最近「减产」，上场联赛对森林更罕有咁连环失机。有统计显示，艾宁夏兰特今季有入波嘅比赛，曼城胜率高达84%，但佢「死火」嘅赛事，曼城胜率就暴跌至33%。

英国《曼彻斯特晚报》报道，艾宁夏兰特今季头21场狂入27球，但之後增长速度逐步下跌，去到最近10场赛事更加有6场「食白果」，而最令球迷担心嘅系，曼城喺艾宁夏兰特入唔到波嘅6场，出现3次输波同1场和波。统计显示，艾宁夏兰特今季有12场冇波入，曼城胜率得33%，同佢有入波嘅84%胜率差天共地。

曼城上季赢英超冠军，靠嘅系团队分工，有7个球员各项赛事合计有双位数入球，但今季目前除艾宁夏兰特一个入32球之外，就只有马列斯有11球进帐，早前利物浦名将加历查就指出，艾宁夏兰特嘅踢法同曼城唔夹，可能会形成「双输」结局。