葡萄牙球星C朗拿度爆出偷食丑闻！委内瑞拉网红Georgilaya日前公开表示，上年3月葡萄牙国家队踢世盃外期间，收到C朗邀请去国家队酒店房聚会，结果两人发生关系，由於Georgilaya本身亦系有夫之妇，今次出轨令佢面临离婚。Georgilaya并公开同C朗合照、以及同C朗好友嘅网上对话，不过C朗就强烈否认呢个偷食指控。

葡萄牙《早晨邮报》周四(2日)爆料，上年3月25日葡萄牙踢世界外围赛期间，C朗邀请Georgilaya去到国家队位於加亚新城嘅酒店312号房见面，Georgilaya喺IG表示：「当我睇到讯息，我谂住只系倾偈同进一步认识，或者可以有更多嘅合照，我冇谂过喺嗰个情况下发生关系，但事实真系发生咗。」

Georgilaya公开佢同C朗喺葡萄牙酒店嘅合照，其中一张系佢抱住C朗块面「献吻」，呢位委内瑞拉网红强调：「虽然我系自愿(性交)，但我感觉畀人操控住，臣服於C朗嘅名气同权力。」觉得被利用嘅Georgilaya透露，佢因为对今次出轨行为觉得愧疚，令佢同老公嘅婚姻出现问题，随时离婚收场。

根据偷食风波嘅时间，当时C朗女伴乔治娜正身怀龙凤胎，4月份就宣布男婴夭折。Georgilaya同时公开佢同C朗多位好友网上交谈纪录，包括另一位葡萄牙球星施美度嘅暧昧对话。事件曝光後，C朗发言人强烈否认，直指Georgilaya嘅故事「完全系虚构同涉及诽谤」。