德甲劲旅多蒙特出产过唔少球星，不过大部份都喺上位之後选择离队，马高列奥斯算系当众嘅异数，呢位中场好波之人已经效力「蜜蜂兵团」11年，佢同球会合约季尾完结，但有消息指多蒙特开出嘅新约，竟然要佢减薪5成，随时逼走呢位球会Icon。

马高列奥斯系公认嘅天才球员，虽然足球生涯经常受伤影响发展，但佢健康上阵嗰阵都有好表现，系球迷嘅超级宠儿。但据德国《图片报》报道，多蒙特向马高列奥斯开出嘅新约，要佢由依家1,200万欧元年薪，大幅减至600万欧元，改用奖金条款取代。

冬季转会窗期间，已经传过马高列奥斯可能离队消息，传闻RB莱比锡对佢好有兴趣，多蒙特总监基尔亦证实续约要时间处理：「马高列奥斯系多蒙特传奇，佢非常专业咁去处理续约问题，依家仲未有任何决定，而且需要一定时间，唔会喺4月或者5月有结果。」