早前入选国际足协年度最佳11人嘅祖奥简斯路，日前受访大爆佢冬季离开曼城嘅原由，呢位葡萄牙国脚直指哥迪奥拿「唔信佢」系主要原因，不过佢同时表明会支持曼城喺英超夺冠，令佢可以喺德甲、英超「打孖」庆祝。

祖奥简斯路上季被视为欧洲最佳闸位球员之一，佢自爆离开曼城系被逼走：「自世盃後，哥迪奥拿改变踢法，佢想两闸多啲入中间，所以佢更锺意用尼敦阿基同列高路易斯。球员总系自私，我无意踩其他球员，只系觉得自己值得上阵，结果同意离开系最好选择。」虽然同曼城有啲「不欢而散」，但祖奥简斯路表示仍然支持曼城夺冠：「喺英超我梗系支持曼城，希望到球季完结之後，我可以喺德国同英格兰庆祝2次联赛冠军。」

不过呢位葡萄牙国脚依家喺拜仁亦面临相同困局，近期教练拿高斯文宁愿用史坦尼锡做正选，祖奥简斯路已连续3场坐冷板，上轮联赛更加坐足90分钟，消息指拜仁季尾将佢收购机会唔大，令简斯路「两头唔到岸」。