祖云达斯喺意甲4比2大胜森多利亚，近10仗8胜状态弗到漏，不过近期复出嘅保罗普巴再度缺阵，会方赛前宣布佢又受伤，要休息至少1个月，消息指祖记对呢位法国中场耐性已到极限，打算今夏「送瘟神」将佢送去巴黎圣日耳门，同对方交换意大利中场马高华拉堤。

普巴去年夏天同曼联约满回复自由身，免费重返祖记，当时「斑马兵团」以为有着数，点知「免费先系最贵」，普巴喺美国集训第1日就受伤，一直抖咗半季，世盃都缺席埋，直至近期先复出，但前仗因为开会迟到被踢出大军名单，依家又再受伤休养。

今季普巴前前後後喺祖记仅上阵35分钟，但就享有1000万欧元年薪嘅意甲顶级工资，祖记近日同佢商讨，希望普巴减薪一半，但遭拒绝，於是惟有将佢送走，环顾当今球坛，养得起普巴嘅只有PSG。

意大利传媒报道，PSG今夏大换班，主帅亦将换人，好大机会由施丹出山执教，中场亦势必换血，到时祖记就会同PSG研究，用普巴交换华拉堤方案是否可行，令双方各取所需。