热刺喺周日(19日)凌晨英超，作客临尾香被包尾嘅修咸顿逼和3比3，争入联赛前4嘅形势变得被动，领队干地赛後更有爆炸性记者会，用「千字文」疯狂炮轰球员同球会，用晒「自私自利」、「永远无冠」、「习惯失败」等激烈字眼，干地嘅行为被视为国际赛期间「博炒」手段，有望求仁得仁。

热刺今仗完半场前由柏度朴路射入领先，但换边後1分钟即被查阿当斯追平，热刺失守後迅速反攻，哈利卡尼同比列锡分别入波再领先3比1，不过修咸顿未有放弃，禾确特77分钟追成2比3後，美兰尼尔斯喺补时博到12码，禾特普斯射入追成3比3完场。热刺依家仍排第4位，但只系领先纽卡素2分兼踢多2场，形势被动。

盛传想返意大利嘅干地，赛後记者大爆发，用「千字文」丧插球员同球会：「球员已经习惯失败，佢哋唔使为重要锦标而战，佢哋唔想喺压力下比赛，只想轻轻松松踢波，呢个就系热刺嘅故事。我只见到11个自私自利，唔肯帮其他人嘅球员，无论训练定正式比赛都一样，我一直尝试隐瞒呢个情况，但依家只剩10场联赛，有人仲觉得热刺可以竞争，争乜？争第7、第8定第10？」

干地继续将矛头指向球员：「我唔习惯排呢啲位置，所以我好失望，球会、领队同职员当然有责任，但系球员呢？球员唔使负责任？热刺近20年都冇赢过冠军系点解？无论边个执教，每季都系一样，热刺可以换好多个领队，但球员情况唔改变，永远都唔会有冠军，相信我。」

季尾同热刺约满嘅干地，被问到佢嘅合约问题会唔会影响球员表现，干地再度发炮：「你又帮球员搵藉口，一个又一个藉口，继续帮佢哋搵藉口啦！我嘅未来、球员冇信心......继续保护佢哋啦！继续啦！继续啦！领队同球员收好高人工，唔系要搵藉口，今次系我足球生涯第1次遇到呢个情况，我已经冇能力改变。」