热刺上场联赛被修咸顿逼和3比3後，领队干地喺赛後记者会大爆发，毫不留情狂插球员自私自利，批死热刺唔改变永远冇盃捧。据报热刺主席利维召开危机会议後，干地已经飞返意大利，而部份球员就对干地非常不满，要求利云喺今个国际赛期内将干地炒鱿。

英国《太阳报》同《每日邮报》报道，热刺喺周日(19日)召开危机会议，干地解释佢嘅炮轰矛头系指向球员，并非攻击球队管理层，而主席利维仍未决定下一步行动，不过干地喺会议後已经如常飞返意大利陪家人，仲使唔使飞返英国仍系未知数。

消息指热刺部份球员已经顶唔顺干地，要求利维喺国际赛期间换帅，尤其干地同热刺嘅合约季尾完结後，几乎肯定唔会续约，而且经过干地今次炮轰後，将帅之间已经完全失去信任关系，今季余下赛事好难再继续合作。