C朗加盟沙特球队艾纳斯4个月，开始对现状不满，佢认为球队实力唔够强，联赛只排第2，要求会方立即增援，主帅鲁迪加西亚亦受牵连，随时收「大信封」。

虽然C朗喺艾纳斯嘅个人数据尚算过得去，上阵10仗入11球，但艾纳斯却由加盟时嘅联赛第1跌落第2，当地传媒报道，C朗认为球队实力唔够强，要再增兵。

报道指，C朗觉得自己喺场上支援不足，已向高层反映，要求至少签入3名顶级球员，以确保球队能在国内及国际赛都有好成绩。

据统计，艾纳斯球员总身价为8075万欧元，系成个沙特联赛之冠，换句话说，艾纳斯球员实力唔算差，如今C朗认为球队实力不足，同佢之前喺曼联质疑会方组军不力嘅情况相似，当C朗离队，曼联立即重拾正轨，捧走英联盃，现时喺联赛前4位置，仲有机会争欧霸盃同英足盃。

面对C朗不满，艾纳斯主教练鲁迪加西亚成为磨心，佢一直表现强势，拒绝高层插手球队事务，依家成绩下跌自然孭晒镬，嚟紧下周中艾纳斯将会同宿敌希拉尔上演打吡战，呢场胜负将决定鲁迪加西亚去留，如果鲁迪加西亚被炒，会方将会请返上一任教练阿根廷嘅鲁素回巢领军。