车路士喺欧联8强首回合0比2不敌皇家马德里，输波结果系唔少球迷预料之内，不过车路士班主保利喺开波前，公开「预测」车仔可以大胜3比0，结果沦为网民笑柄。

车路士作客皇马前，班主保利喺马德里出席一个高层饭局，离开嗰阵被《天空体育》捕获进行直播访问，佢被要求预测呢场波嘅结果，保利就话：「车路士会赢波...3比0。我好有信心，今晚我哋会赢3比0。我哋视车路士为一个非常长远嘅计划，有好多工作要做，我哋对球会嘅未来非常兴奋，车路士会有光明嘅未来。」

被皇马2比0击倒後，保利嘅言论即成为球迷笑柄，网民留言：「你唔可以怪责车路士领队，所有责任都喺保利身上，佢搞车路士当打游戏机一样，仲要预测车路士赢3比0，坚尴尬！」亦有网民安慰自己：「佢可能预测次回合嘅比数......」美国富商保利上年5月上任以来，不断闹出笑话，有传佢曾经干涉前领队杜曹排阵，但排错一个4-4-3嘅12人阵式。