曼联首席射手拉舒福特因伤长抖，不过法国前锋安东尼马迪尔及时复出，近2场正选上阵都有唔错表现。盛传曼联今个夏天将引入顶级前锋，同球会只剩1年多合约嘅安东尼马迪尔，好可能会被放弃，不过前曼联球星贝碧托夫就呼吁坦哈格，绝对唔可以卖走呢位法国球星。

曾经喺摩纳哥同安东尼马迪尔做队友嘅贝碧托夫表示：「我知道佢嘅能力未完全展示出嚟，只系因为伤患影响佢嘅发挥，安东尼马迪尔需要领队100%信任，佢要知道自己就算偶尔犯错，都唔会被换走或喺下场被贬後备，只要佢得到呢份信任，就可以踢出最佳水平。」

不过，坦哈格日前表示伤患问题，将决定安东尼马迪尔前途：「我当然有望佢(下季)留低，但佢嘅伤患历史令事情变得困难，佢嘅能力绝对系顶级，当佢状态好嗰阵，成队波都会表现得好。」喺拉舒福特复出前，安东尼马迪尔都会继续担正，季尾赛事可唔可以保持健康同交货，会系佢曼联命运嘅关键。