巴塞隆拿件10号波衫向来系销量保证，由马纳当拿、罗马里奥、朗拿甸奴到美斯，每个10号仔都系球迷追捧嘅超级偶像。西班牙《阿斯报》报道，巴塞非常关注现任10号安素法迪波初滞销问题，据报呢位新星嘅波衫销量连前6名都入唔到。

自美斯离队後，巴塞就力捧新人王安素法迪接棒，但呢位20岁小将近年经历严重伤患，依家连正选都抢唔到，受欢迎程度直线下降，依家喺巴塞官方商店连「现货」都冇，据商店职员表示：「安素法迪件波衫连销量Top6都入唔到，球迷想买佢件波衫要即场印制，商店冇呢件衫嘅存货。」

据报依家巴塞「卖衫王」系加维，自从佢转着6号之後销量暴升，可惜因注册问题而被逼转番30号，紧随其後嘅系柏迪同罗拔利云度夫斯基，销量Top 6入面其余3人系达史特根、法兰基迪庄同朗奴阿拿奥祖。