曼联正式宣布同翼锋阿历真度加拿祖续约5年至2028年夏天，粉碎皇马等豪门想收购呢位18岁阿根廷国脚嘅传闻，红魔鬼球迷对於加拿祖续约，都感到非常兴奋，期望佢成为下一位C朗。

阿历真度加拿祖3年前由马体会青年军转投曼联青年军，上季季尾首次为一队上阵，今季备受领队坦哈重用，各项赛事上季32次，射入5球及6次助攻，可惜上月中对修咸顿一役受伤，已经缺阵一个半月。

加拿祖续约之後话：「我觉得好骄傲同激动，好开心可以继续喺曼联嘅生涯，同队友们一齐去实现目标，感谢领队同教练团对我嘅帮助，令我不断进步，迈向成功，希望喺球迷面前，创造更多美好回忆。」

由於加拿祖一直视C朗为偶像，加上呢位葡萄牙球星首度加盟曼联正系18岁，红魔鬼球迷纷纷喺网上留言，希望加拿祖续长约之後，可以重演当年C朗走上巨星之路嘅好戏。