热刺将意大利名帅干地炒鱿後，早前又将看守领队史泰连尼解雇埋，搵新帅计划亦处处碰壁，朴达、普捷天奴、高柏尼等目标都未能成事，据报热刺希望请德国少帅拿高斯文，虽然呢位前拜仁慕尼黑教头对执教热刺有怀疑，但佢师傅兰历克日前表示，热刺系拿高斯文落班好选择。

上季执教曼联成绩麻麻嘅兰历克，依家系奥地利国家队领队，佢日前接受德国《天空体育》访问话：「热刺唔会要求领队即刻帮球会拎第1，佢哋喺好多方面都系一间好刺激嘅球会，热刺有世上其中一个最好嘅球场、有最好嘅训练设施，有利维呢个经营球会多年嘅主席，如果热刺真系想请拿高斯文，佢哋要请个总监去支持佢。」