英国《太阳报》爆料，指意甲劲旅祖云达斯非常有兴趣今夏向曼联借用前锋格连活特，仲打算搵中场保罗普巴帮手游说呢位前红魔鬼队友加盟。保罗普巴同格连活特都系出名嘅麻烦友，难怪唔少球迷都指祖记可能嫌球队未够乱，所以先至想签格连活特。

21岁嘅格连活特上年1月因为涉嫌强奸及殴打女友，被警方拘捕，从此被曼联雪藏，虽然呢位新星今年2月已获撤销控罪，但曼联方面仍然唔敢起用佢，并且禁止佢归队操练。

早前已经传出AC米兰、罗马想趁机借用格连活特，现时祖云达斯亦加入争夺，据悉已经派人联络格连活特嘅代表，倾加盟嘅可能性，甚至准备打「人情牌」，出动保罗普巴力邀格连活特一齐拍住上。

事实上，格连活特一旦离开曼联，去新环境搵食，如果有1位相熟前队友照应，的确比较易适应，祖记能否借到呢位前锋，普巴将发挥关键角色。