曼联喺英超2连败，联赛前4席位出现暗涌，「红魔鬼」名宿加利尼维利赛後将矛头，再次指向「大众箭靶」格拉沙家族，不过佢嘅冤家、利物浦名将加历查就寸爆，批评加利仔将所有责任推晒喺格拉沙家族身上，无视坦哈格等管理层嘅责任。

曼联输畀韦斯咸後，加利仔社交网留言：「曼联今场踢得好差，但坦哈格可以睇清呢班球员嘅能力都系一件好事。真正罪人系格拉沙家族，佢哋完拖到完季先卖盘？全队上下都处於不明朗情况，莫讲话买人计划同资格，依家连边个做班主都未知！」

指责格拉沙家族，当然得到唔少曼迷支持，不过加历查就踩场回应：「全部都系格拉沙家族嘅错呀！系佢哋安排韦格贺斯踢10号位、系佢哋拎9,000万镑去买安东尼马菲奥斯、系佢哋用7,000万镑同31岁嘅卡斯米路签5年约呀！」