周日(14日)凌晨法甲赛事，巴黎圣日耳门(PSG)主场5比0大胜阿些斯奥，今场焦点落喺停赛复出嘅美斯身上，主场巴黎球迷对佢仍充满敌意，全场对美斯大喝倒采。

美斯早前因擅自去沙特做商业活动，被PSG停操停赛2星期，事後美斯拍片公开道歉，但仍受到球迷猛烈批评。教练加迪亚赛前表明美斯今场会复任正选，当现场宣读出场名单嗰阵，讲到美斯即刻出现极大嘘声，比赛期间美斯每次触球亦有嘘声。

庆幸PSG演出未受影响，最终凭基利安麦巴比梅开二度，加上法比安彭拿、阿舒拉夫同对方摆乌龙，大胜5比0完场。PSG依家领先次席朗斯6分，只剩3轮联赛下夺标机会极高，输波嘅阿些斯奥亦确定护级失败，下季降落法乙比赛。

对於美斯受到球迷狂嘘，PSG教练加迪亚就大耍太极：「美斯掂波嗰阵有嘘声，但同时亦都有掌声，佢继续踢出惯常嘅角色，美斯已习惯面对呢啲困难情况，接受所有嘘声同掌声。」