曼联季尾嘅伤兵潮未有停止，球会周二(16日)发声明证实，奥地利中场沙比萨因为膝伤问题，将会缺席今季余下赛事，由於佢嘅借用合约夏天完结，曼联亦未决定系咪向拜仁慕尼黑将佢正式收购，沙比萨嘅红魔生涯可能已经完结。

曼联声明表示：「沙比萨受到膝部伤患影响，好不幸今季都唔能够再上阵，佢下半季喺球会担当重要角色，自1月份由拜仁慕尼黑加盟後，上阵18场有3个入球，包括赢得英联盃冠军，佢亦有份喺决赛上阵，球队上下对失去沙比萨都好失望，我哋正争取强势完成今个赛季，亦好感激沙比萨嘅贡献。」

唔少球迷表示，曼联嘅声明似系「告别信」，英国媒体亦指曼联仍未决定系咪尝试将佢买断，甚至未有同拜仁慕尼黑作出交涉，传闻曼联今夏会再买中场，法兰基迪庄、祖迪比宁咸同迪格兰赖斯等都曾经传出绯闻，沙比萨未必会系坦哈格嘅心水人选。