巴塞隆拿西甲封王，最终竟然上演胜利大逃亡！巴塞隆拿周一(15日)凌晨作客爱斯宾奴，凭罗拔利云度夫斯基梅开二度赢4比2，抛离次席皇家马德里14分下，提前4轮锁定西甲冠军。重夺失落4年嘅锦标，巴塞全队即场疯狂庆祝，但此举却引起主队球迷不满，大批球迷「擸架生」冲入场追杀，吓到巴塞职球员狼狈逃走。

巴塞今场只要赢波就捧盃，球员战意十足，罗拔利云度夫斯基11分钟先开纪录，20分钟巴迪接应柏迪传中射成2比0，「罗拔仔」完半场前攻入个人第2球，巴塞半场基本上已锁定冠军。53分钟祖利斯古迪再为巴塞建功，大局已定下尾段放软手脚，被爱斯宾奴追番2球，巴塞仍赢4比2拎到最重要嘅3分。

自2019年後再尝西甲冠军滋味，巴塞职球员完场後喺场上狂欢，并且围圈唱歌跳舞庆祝，但作为加泰罗尼亚死敌爱斯宾奴嘅球迷就眼火爆，大批球迷拎住摺櫈等架生冲入场，朗奴阿拿奥祖等球员发现後，即示意队友迅速逃入更衣室，有职要逃走期间跌到一仆一碌，要由防暴警察阻止激进球迷接近，场面相当狼狈。

巴塞教练沙维拎到执教後首个联赛冠军，佢赛後表示：「感觉好正！球队做得好好，经过10个月嘅努力同牺牲，巴塞隆拿同球迷值得有呢个冠军。我哋用一场精彩胜仗嚟锁定冠军，能够喺一场打吡战入面封王更有意义。」对於完场後嘅狼狈画面，沙维就话：「庆祝好正常，但我明白呢度唔系我哋主场，唔可以表现唔尊重，呢啲事好难控制，所以我觉得最好即刻返入更衣室。」