皇家马德里周日(14日)凌晨西甲主场1比0击败基达菲，比赛尾段出现争议事件，皇马喺84分钟嘅换人疑似「弹弓手」违规，一度盛传会被西班牙足总判输波，不过西班牙媒体事後公开相片，证明皇马系清白，将唔会争到检控。

事件发生喺第84分钟，当时皇马已经换咗4个球员，教练安察洛堤决定用奥迪奥苏拿入替马高阿辛斯奥，正当後者差唔多行到後备席，卡马云加就受伤示意换人。《每日体育报》等媒体指出，当时嘅换人手续已经完成，皇马突然改为换走卡马云加属於违规，基达菲投诉嘅话，皇马将会被判输波扣3分。

不过《马卡报》随後公开证据，证明马高阿辛斯奥当时只系行到场边白界线，并未完全离开球场，根据西甲条例，被换走球员需要完全离开球场，先会视作完成换人，所以皇马临时改换卡马云加并冇违规。

事实上，衞冕失败嘅皇马已经稳夺下季欧联资格，就算扣3分对佢哋影响都唔算太大，依家注意力放喺欧联4强次回合大战曼城之上。反而基达菲依家排尾3面临降班，呢3分随时系决定生死嘅判决。不过报道指基达菲喺检查过有关画面後，已放弃向西班牙足总作出投诉。