今晚欧霸4强次回合生死战，利华古逊主场再遇罗马。利华首回合赔了夫人又折兵，少帅沙比阿朗素未够经验，畀师傅兼罗马「寸王」摩连奴机关算尽，证明姜愈老愈辣，加上近4次碰头罗马未输过，受让必捧让球客胜。（Now 644周五凌晨3时直播）

首回合利华古逊作客输0比1之余，仲有防中安特列治同後衞哥苏奴伤出，两人要提早收咧，当中前者缺阵对攻守组织影响甚大。连同本来已因伤提早抖暑嘅柏德列舒希克，以及啱啱宣布挂靴嘅比拿拉比，利华可谓天残地缺，就算少帅沙比阿朗素几叻都好，亦巧妇难为无米之炊。

论实力两队其实相当接近，但摩连奴一系列针对性部署，令佢哋喺首回合处处占得先机，除咗刻意加强防守外，不时犯规打断对手节奏，再由奇兵艾度亚度保夫奠胜赢1比0，佢更以20岁350日之龄，成为「雌狼」史上欧洲赛4强最年轻士哥拿。正正系呢啲细节加加埋埋，令罗马先拔头筹，摩帅尽显功架，徒弟沙比阿朗素仲有排学。

由於利华落後一粒，为晋级今仗非胜不可，奈何人脚不整下焗攻，随时跌入「寸王」嘅圈套。摩连奴作为5夺欧洲赛冠军教头，打淘汰赛最有心得，尤其揸住一粒喺手大可睇定嚟食。加上双方近4次碰头，罗马取得2胜2和未输过，绝对有力全身而退，连续两年杀入欧战决赛，让球客胜咪错过。