周六（20日）晚英超，「双红」分途出击，利物浦虽然凭最後1次喺晏菲路比赛嘅罗拔图法明奴建功，喺主场以1比1逼和阿士东维拉，联赛7连胜断缆之余，因另一边厢曼联击败般尼茅夫，令红军争下届欧联入场券形势唔乐观。

利物浦今仗有主帅高普停赛，冇得喺场边督师，上半场佢哋攻势唔入肉，仲有後衞伊巴希马干拿迪更喺禁区侵犯对手被罚12码，可惜维拉射手奥尼屈坚斯宴客。但过到初一过唔到十五，积及蓝斯入楔得手打开纪录。下半场红军积极反扑，加普於混战中快射破网，不过队友华基尔云迪积克越位在先，食咗铺诈胡，之前已宣布季尾离队嘅罗拔图法明奴，末段後备落场，接应穆罕默德沙拿妙传扳平，抢番1分。

至於曼联靠中场卡斯米路一记半车身靓波建奇功，作客以1比0击败般尼茅夫，现时领先第5位嘅利物浦3分兼打少1场，由於红军只净番一场联赛，曼联争前4嘅下届欧联入场券形势大好。