曼联今季成绩冒升，进步最大球员非拉舒福特莫属，呢位英格兰国脚今季各项赛事已入29球，系佢出道以来最佳成绩，不过呢位25岁球星同曼联只剩1年合约，续约谈判更一直「拖字诀」。消息指原来拉舒福特系想等新班主上场，博取更优厚嘅续约条件！

拉舒福特目前喺曼联有20万镑(约195万港元)周薪，原本合约今夏届满，曼联就启动自动续约1年条款，并且开出一份30万镑(约292万港元)周薪嘅新约，可惜「福仔」仍然唔肯接受，令谈判陷入僵局。曼联领队坦哈格日前表示：「我知道续约拖延嘅原因，但唔会讲出嚟，我哋想佢留低，佢亦都想留低，大家要等待呢个过程，我哋最後都会搵到对方。」

英国《太阳报》报道，拉舒福特喺续约采取「拖字诀」，系希望等到新班主上场後，可以提供更优厚嘅合约条款，据闻曼联新班主将会系英国超级富商拉特克利夫或者系卡塔尔财团，新班主上场当然唔想失去球队王牌球星，有利「福仔」拎到最好嘅待遇。