今季英超上位嘅日本国脚三笘薰，4月中打後无以为继，近9场0入球0助攻，寻晚1比4大败於纽卡素一仗，三笘薰演出更受当地传媒批评，「三球王」地位动摇。

对纽卡素一仗，《SussexLive》对三笘薰评5分，评语系：「白礼顿上半场顶唔住纽卡素攻势，三笘薰几乎冇掂波，睇嚟好攰。」另一网站《Sussex World》亦仅评6分，评语系：「好少见到佢同捷比亚一对一，虽然佢攞波时好有威胁，但呢种情况并唔多，全场踢得好静。」

三笘薰喺3月至4月初5场联赛交出2入球4助攻，被各大网站捧到上天，其身价亦由300万欧元暴升至3000万欧元，但球圈好现实，佢最近突然断崖式下滑，近9场0数据，立即惹来批评，有网民指呢个系必经阶段：「好正常，佢初头冇人重视，自然踢得好，依家身价暴升，对方肯定重点针对。」