德甲争霸峰回路转，多蒙特周日(22日)作客3比0大破奥格斯堡，喺联赛尾2轮再次超前拜仁慕尼黑上榜首，今个星期六(27日)煞科战只要主场击败缅恩斯，就可以重夺失落11年嘅德甲冠军，亦打破拜仁慕尼黑10连霸嘅垄断局面。

实力超班嘅拜仁喺圣诞节同半季都系榜首，但自3月份争议性炒教练拿高斯文，杜曹上任後一直滑落，被多蒙特後来居上。两队季尾你追我逐，第30轮多蒙特失分後，拜仁重上榜首，但嚟到尾2嘅33轮，拜仁周六(21日)输畀RB莱比锡，令多蒙特重现希望。

多蒙特今仗前连续6场作客不胜，今场作客奥格斯堡亦老鼠拉龟，就算38分钟主队守将乌度卡食红牌，多蒙特亦一直入唔到波。直到58分钟，因睾丸癌缺席上半季嘅施巴斯坦贺拿打破僵局，呢位科特迪瓦射手84分钟「执鸡」再入一球，加上祖利安白兰特补时锦上添花，助多蒙特赢出关键一仗。

多蒙特依家领先拜仁2分，喺自剩1轮联赛之下，煞科战只要主场赢缅恩斯，就可以继2012年後再尝德甲冠军滋味。由抗癌成功到冠军在望，施巴斯坦贺拿亦上演人生大逆转：「难以置信！如果半年前有人话我知我今日会身处呢个环境，我唔会相信。」

施巴斯坦贺拿上年夏天加盟，被视为艾宁夏兰特嘅继任人，但球季未开始就被诊断患睾丸癌，结果用咗半年时间宣布抗癌成功。下半季复出成为多蒙特爆发主因，佢18场联赛交出9个入波同5次助攻，如果最终帮助多蒙特夺冠，堪称系足球坛嘅童话故事。