阿根廷球星迪马利亚周三(7日)喺个人IG宣布，佢嘅祖云达斯生涯正式结束，今个夏天将回复自由身。迪马利亚总结佢喺祖云达斯之旅系「失败」，但亦认识到好多新朋友，有传佢可能会重返昔日球会宾菲加效力。

现年35岁嘅迪马利亚，上年以自由身签约祖云达斯1年，佢就宣布唔会再续约：「喺意甲呢段困难日子正式完结，但我知道自己已献出所有去帮助球队争标，最终失败令我觉得好难受，但我亦好开心认识好多新朋友，成为呢个更衣室家庭一份子，好多谢祖云达斯，你哋永远会喺我嘅心入面。」

迪马利亚今季虽然受伤患影响，但喺各项赛事仍上阵40场，交出8个入波同7次助攻。据葡萄牙传媒报道，葡超劲旅宾菲加有意向迪马利亚招手，呢位阿根廷国脚喺出道初期，曾经为宾菲加效力3个球季(2007年至2010年)。