沙特阿拉伯联赛再蕴酿惊天收购！据《CBS Sports》报道，希拉尔斟介球王美斯行动失败後，已转移目标向巴西球星尼马埋手，希拉尔最高代表团上周五(9日)已飞抵巴黎进行斟介，开出同C朗拿度相约嘅2亿欧元(约16.85亿港元)年薪，巴黎圣日耳门(PSG)已为转会开绿灯。

获沙特主权财富基金(PIF)控制嘅希拉尔，原本视美斯为王牌收购，不过对方决定加盟美职国际迈亚密後，希拉尔就即刻转斟尼马，并且迅速派代表团去巴黎进行谈判。31岁嘅尼马目前合约去到2025年，不过PSG自上年夏天已经将佢挂牌出售，如果有球会愿意接收，PSG亦唔会作出阻拦，报道指PSG只要求4,500万欧元(约3.8亿港元)转会费就可放人。

依家转会关键落喺尼马嘅意向之上，据报PSG过去几过月曾经向多支欧洲球会兜售，但系反应一般，而希拉尔今次诚意十足，开出合约嘅2亿欧元年薪同艾纳斯嘅C朗拿度睇齐，最重要系近期有大量名将相继登陆沙特阿拉伯联赛，令呢项赛事成为球坛焦点。

沙特阿拉伯冠军伊蒂哈德早前宣布获宾施马加盟，并且同另一法国球星尼高路简迪达成转会协议。拥有C朗拿度嘅艾纳斯就想收购水晶宫前锋韦费特沙夏，而根度简、马列斯、阿历斯山齐士、奥巴美扬等盛传亦收到沙特球会聘约。