国际米兰喺欧联决赛被睇低一线下，同曼城踢到势均力敌，论埋门威胁性甚至更胜一筹，可惜「蓝黑兵团」输在把握力差，其中後备上阵嘅卢卡古再次成为千古罪人，佢落场後连环失机兼帮曼城护空门，赛後被球迷闹爆，认真惨情。

卢卡古今场喺57分钟入替迪斯高，冇耐曼城就入波领先，国米倾力反扑制造唔少机会，包括费达历高迪马高嘅必入头槌，喺白界前被卢卡古意外挡出；呢位比利时前锋完场前2分钟又喺小禁区头槌攻门，冇力度兼冇角度下被救出，白白错失追平机会。

赛後大批网民闹爆卢卡古嘅表现，甚至有曼城球迷选佢为「曼城最佳球员」。卢卡古嘅把握力一向为人诟病，比利时上年喺世盃被克罗地亚踢出局，佢亦因连环失机成为千古罪人，前比利时助教亨利表示：「佢再一次面对世盃嘅经历，虽然我觉得迪马高嗰球好难讲，但大家都一定会怪责佢，而最後6码点个头槌会成为佢永远嘅噩梦。」

卢卡古依家前途成疑，佢今季由车路士外借国际米兰1季，今场决赛可能会系佢最後1次为国际米兰披甲。国米班主张康阳赛後表示：「卢卡古好爱国际米兰，呢一点非常明显，佢系一个大好人，可惜佢同车路士仲有合约，我哋要同车路士再倾，令卢卡古未来更加清晰。」