曼城一如预期，以大热姿态捧欧联冠军，比较令人意外系入波功臣并非射手艾宁夏兰特，或者近期频频建功嘅根度简，反而系甚少入球嘅防守中场洛迪卡斯简迪。呢位26岁西班牙国脚今季各项赛事52场担任正选，成为哥迪奥拿教波生涯，单季第2多踢正选嘅非门将球员，仅次於美斯，充份凸显洛迪卡斯简迪核心地位，佢今仗更一箭定江山，由「低调之男」跃升做主角。

众所周知，哥迪奥拿最爱美斯，执教巴塞隆拿期间，曾於2011/12年球季，派呢位阿根廷球王踢57场正选，洛迪卡斯简迪今季踢咗52场正选，可见佢喺哥帅心目嘅地置，犹如当年嘅美斯。

洛迪卡斯简迪今季仅入4球，技术亦非出众，平时表现比较唔起眼，但佢默默耕耘，喺中场扫荡及拦截，对於球队有重大贡献，并当选今场欧联决赛最佳球员。

值得一提，曼城喺2021年欧联决赛，哥迪奥拿排出冇防中阵式，洛迪卡斯简迪该仗全场做观众，结果输畀车路士，哥帅战术部署遭受外界强烈质疑，相隔2年，曼城正正系靠防中洛迪卡斯简迪入波捧盃，为哥迪奥拿赎罪，够晒戏剧性。