欧联冠军系所有球员梦寐以求嘅奖项，有唔少巨星穷一生之力都赢唔到，但亦有人可以「坐」住捧盃，而且仲要系2次！曼城後备门将史葛卡臣，今场就成为史上第2个代表2间英超球会赢欧联冠军嘅球员，而佢喺呢2届欧联只系踢过1场咁多。

37岁嘅史葛卡臣系曼城3号门将，今场决赛佢亦有份坐後备席，最终继2005年为利物浦夺冠後，第2度赢得欧联冠军奖牌。18年前史葛卡臣因利物浦2号门将却克兰受伤，喺决赛出任杜迪克後备，见证利物浦上演伊斯坦布尔奇迹，当年佢喺8强都曾经为利物浦把关过1场，不过今届佢就冇为曼城喺欧联踢过1分钟比赛，但一样都有奖牌拎，成为史杜列治後(车路士、利物浦)，史上第2个代表2间英超球会赢欧联冠军嘅球员。

虽然史葛卡臣喺曼城冇乜机会，但领队哥迪奥拿早前仍决定同佢续约1年，哥迪奥拿亦大赞佢喺球队影响力：「如果我要畀年轻球员一个最好嘅意见，我会叫佢哋尽量接近史葛卡臣，留心佢讲嘅所有说话，对佢哋将来会有好大益处。」