布斯基斯离队，美斯又未有回归，巴塞隆拿惟有物色新中场，睇中费伦天拿摩洛哥世盃中场，电视台译做「安拉拔」嘅苏夫恩岩拉伯特，而且费伦愿意减价到2000万欧元(约1.69亿港元)，巴塞有望平价签入。

26岁嘅苏夫恩岩拉伯特喺卡塔尔世盃一战成名，被冠以「非洲加度素」称号，佢喺《转会市场》身价2500万欧元，但同费伦合约尚余1年，紫百合急於将佢放售，所以减价500万欧元，明益巴塞。

虽然巴塞目标首选系苏比文迪，不过皇家苏斯达定下解约金7500万欧元，巴塞买唔起，沙维将目标人选改为身价较平嘅「安拉拔」，巴塞仲想再降低支出，希望用球员同费伦交易，悭得就悭。