克罗地亚再创佳绩！周四(15日)凌晨欧国联4强大战，克罗地亚作客东道主荷兰，戏剧性喺加时反胜4比2晋级，首次杀入欧国联决赛。克罗地亚喺2018年世盃决赛饮恨、去年世盃亦拎到季军，今次决赛将会对西班牙或意大利，今场当选最佳球员嘅莫迪历，期望喺退役前一尝捧盃滋味。

克罗地亚今场继续用「黄金一代」老将挂帅，37岁嘅莫迪历系中场核心、31岁前锋卡马历、34岁嘅比列锡、30岁嘅波索域等悉数正选，面对用咗唔少新人嘅荷兰，上半场踢成均势，不过荷兰喺34分钟就搵到缺口，当耶尔马伦劲射先开纪录。

换边後克罗地亚发力，莫迪历54分钟抢走加普脚下球後杀入禁区，加普情急下犯规输12码，卡马历操刀为克罗地亚追平；72分钟柏沙历再接应队友传中射入，为克罗地亚反超前2比1。以为荷兰大势已去，补时6分钟路亚兰治窝利抽入追成2比2。

打不死嘅克罗地亚喺加时愈踢愈有，般奴柏高域继上年世盃8强加时射破巴西後，今场又喺禁区外狂抽入波，佢喺116分钟再博到12码，今次由莫迪历操刀射成4比2锁定胜局。克罗地亚历史性杀入欧国联决赛，1射1传嘅莫迪历亦获选为今场最佳球员。

莫迪历赛後表示：「除咗头20分钟，我哋踢出非常精彩嘅表现，如果决赛赢埋会系一个神奇嘅成就，但依家最重要系好好休息、好好准备决赛，如果可以为克罗地亚带嚟史上首个冠军，将会系梦境成真。」克罗地亚1994年先加入国际足协，喺世盃拎过1次亚军(2018年)同2次季军(1998年、2022年)。