西班牙喺欧国联成功夺冠，领队富安迪以老带新嘅安排获得空前成功，今场决赛亦见证神奇一幕，西班牙史上最老同最年轻球员同时正选上阵，37岁嘅捷西斯拿华斯同18岁嘅加维一齐合作，两人年纪足足相差19年！

继4强对意大利踢足90分钟，37岁209日大嘅捷西斯拿华斯喺决赛继续正选踢右闸，进一步刷新西班牙史上最老上阵纪录，而「狂牛兵团」捧盃後，呢位西维尔球星亦创下前无古人纪录，成为第1个赢晒世盃、欧国盃同欧国联冠军嘅球员。

有趣嘅系，今场同时有西班牙史上最年轻球员加维上阵，18岁嘅佢亦成为西班牙最年轻大赛冠军球员。捷西斯拿华斯喺2003年作出职业生涯首演，1年之後加维先至出世，今场呢对「老嫩组合」齐齐捧盃，成为一时佳话。