法国上仗欧国盃外围赛以3比0击败直布罗陀，基利安麦巴比射入1球12码，呢位「新世代球王」今季喺球会及国家队已累积入53球，追平已故法国名宿方亭嘅纪录，「麦总」只要喺周二(20日)凌晨欧国外主场对希腊，再入1球，就可以成为史上单季最多入波嘅法国球员。

方亭喺1958年创下单季入53球，包括当年世界盃轰入13球，成为呢项赛事史上单届最多入波球员，呢位传奇射手今年2月逝世，享年89岁。方亭保持咗65年嘅单季法国射手王纪录，终於被麦巴比追平，呢位巴黎圣日耳门(PSG)球星今季为PSG上阵43场入41球，加上为法国入12球，其中8球来自上年12月世界盃，并成为该届神射手，行紧方亭旧足迹。法国近6次对希腊，取得5胜1负，相信麦巴比要入波打破方亭嘅纪录，机会非常大。

另外，基利安麦巴比自从表明唔同PSG续约後，去向备受关注，会方为免明夏约满人财两失，计划今夏出售佢。英国《每日邮报》指PSG首选将麦巴比卖畀曼联，但前提系必须由卡塔尔财团收购红魔鬼，皆因PSG现时由卡塔尔主权基金拥有，希望益「同乡」。