法甲冠军巴黎圣日耳门(PSG)早前炒咗教练加迪亚之後，急需要聘请新帅，原本目标人物拿高斯文已经拒绝加盟，会方惟有另觅人选，根据法国媒体《RMC》报道，PSG已经派出总监甘波斯接触阿仙奴领队阿迪达，邀请佢接手执教。

阿迪达2019年年底成为阿仙奴主帅以来，球队成绩不断提升，刚过去球季几乎夺得英超冠军，可惜後劲不继，被曼城反超前抢走锦标。不过，兵工厂获得联赛亚军，成绩已经超出预期，年仅41岁嘅阿迪达教波功力备受认同，吸引PSG注意，总监甘波斯甚至已联络过阿迪达，希望佢入「门」。

由於阿迪达只系同兵工厂续约至2024年夏天，即使现时走人，赔偿金亦有限，PSG绝对畀得起。不过，英国《每日邮报》指呢位西班牙少帅几经辛苦，令兵工厂成为争标球队，佢愿唔愿意离开「亲生仔」，实属疑问。

据悉如果PSG斟介阿迪达失败，就会邀请前西班牙国家队主帅安历基，或者波图教练沙治奥干斯卡奥执教。