欧国外J组赛事，冰岛主场迎战葡萄牙，实力上有C朗拿度坐镇嘅葡萄牙肯定秤高一线，不过两队都以崇尚进攻见称，而且今仗将会系C朗第200次为国家队披甲，肯定希望入波赠兴。冰岛新帅亦要争响头炮，预料双方会合演进攻大战，开1.5球嘅半场大机会高。（周三凌晨2时45分开赛）

葡萄牙自世盃後改由西班牙教头马天尼斯执教，欧国外3战全胜，狂入13球而未失1球，表现极具霸气。最重要嘅系，38岁老将C朗拿度喺呢3场都担任正选，证明球队仍然以佢为重心，今场适逢C朗历史性第200次为葡萄牙上阵，一众战士在公在私都要奋力争胜。

葡军Goal手云集火力猛

事实上葡萄牙有唔少入波高手，般奴费南迪斯、贝拿度施华、祖奥菲历斯、拉菲尔利亚奥等都射术精湛，而且有唔少新星争上位，活力十足，可以贯彻比赛初段向对手施压嘅踢法。葡萄牙近4场欧国外作客，有3仗半场总入球开2球或以上。

冰岛喺分组赛1胜2负，要争出线机会唔大，佢哋新帅夏利迪上轮首演1比2输畀斯洛伐克，今仗当然想争响胜鼓。冰岛一向主张进攻踢法嘅「快乐足球」，无论对手强定弱都勇於进攻，今届曾经作客7球大炒列支敦士登，加上今届3轮分组赛都喺上半场开2球或以上，1.5球嘅半场大值得再追。