周二(20日)凌晨欧国盃外围赛B组，法国主场以1比0击败希腊，基利安麦巴比射入12码，一箭定江山，呢位24岁前锋今季喺球会及国家队合共轰入54球，同曼城前锋艾宁夏兰特睇齐，两人隔空展开新世代球王之争。

法国今场赢得比较惊险，踢到51分钟，前锋基沙文喺禁区内遭对手踢中头部，需要军医为佢包紮，球证亦吹罚12码。基利安麦巴比主射被门将扑出，但由於佢起脚前，已经有希腊球员提早走入禁区，球证判重射，麦巴比今次冇甩拖，劲射入网赢1比0，协助法国保持4场外围赛全胜，兼不失球。

基利安麦巴比呢个入波亦有特别意义，佢今季球会及国家队已累积入54球，超越已故法国名宿方亭，成为史上单季最多入波嘅法国球员。根据Squawka统计，麦巴比同艾宁夏兰特喺2022/23年球季，球会及国家队各项赛事总入球数字，同样达到54球，两人被誉为自美斯同C朗之後，新一代球王接班人，正在静静展开一场「暗战」。