曼联嘅巴西翼锋安东尼马菲奥斯，前女友今个月初喺巴西报警，指过去1年多次被安东尼虐打。女事主GabrielaCavallin日前接受巴西媒体访问，进一步披露被安东尼家暴嘅详情，包括被该曼联球星「打爆胸」、禁锢、死亡恐吓等等，连安东尼妈妈都要请心理医生帮个仔睇症，Gabriela表示下一步会去英国提出起诉。

Gabriela日前接受巴西《RecordTV》专访，佢提到首次受虐过程：「佢喺床上捉住我双手打，我个胸入面嘅植入物被打到移位，当时我呼吸唔到，感觉就嚟会死。」Gabriela称安东尼曾威胁如果女方提出分手，佢同肚入面BB都会被杀死，而Gabriela上年6月宣布腹中BB夭折。

任职模特儿同DJ嘅Gabriela表示，安东尼嘅妈妈都知自己囝囝心理有问题，所以曾经请心理医生帮佢，可惜连医生都控制唔到佢嘅情绪。Gabriela月初已向圣保罗警方报案，佢表示下一步会去英国曼彻斯特报案：「我乜都会试，我会去英国报案，告佢伤人、非法禁锢、恐吓同所有对我做嘅坏事。」事件曝光後，安东尼同曼联一直冇作出回应。