上季被曼联外借诺定咸森林嘅门将甸恩轩达臣，借用完结後将重返曼联，喺迪基亚迟迟未续约情况下，甸恩轩达臣重启「红魔生涯」机会理应大大提升。不过据英国《曼彻斯特晚报》报道，领队坦哈格对甸恩轩达臣嘅态度非常不满，几乎肯定唔会再起用呢位前英格兰国脚。

26岁嘅甸恩轩达臣系曼联青训出身，2020年外借锡菲联上位後回归曼联，一度被视为取代迪基亚嘅人选，可惜佢唔甘心喺後备席等待「接班」，上年外借森林後更公开炮轰曼联「浪费佢黄金时间」，更表明佢喺坦哈格上任前要求转会，系唔想坦哈格睇佢练波後唔肯放人。

《曼彻斯特晚报》消息指，坦哈格上年底曾经同甸恩轩达臣视像会议，亦系两人首次会谈，当时坦哈格问佢想唔想提前终止借用返曼联，结果被甸恩轩达臣一口拒绝，坦哈格之後喺冬季转会窗改为借用毕兰特做後备龙门，但佢对甸恩轩达臣嘅态度就非常不满。

甸恩轩达臣今年1月重伤提早收咧，森林亦改为借用基罗拿华斯把关，消息指森林领队谷巴满意甸恩轩达臣表现，有意向曼联正式提出收购。