西甲劲旅皇马正式宣布，同中场却奥斯续约1年至明年夏天，粉碎佢可能去中东掘金嘅传闻，呢位33岁德国名将表示，只会留喺顶级联赛踢到挂靴，似乎暗寸紧2位球王美斯同C朗为延续球员生涯，「沦落」到要去美国同沙特阿拉伯搵食。

却奥斯2014年由拜仁慕尼黑加盟皇马以来，总共上阵417场，射入27球及89次助攻，协助球队夺得20项冠军。呢位老将刚过去球季为「银河舰队」52次披甲，入2球及6次助攻，佢表示自己对於球队仍然非常重要，所以决定续约：「我仍然觉得自己系皇马重要一员，1月已经向会方表明，冇打算转会，对我而言，最重要系继续踢高水平赛事，而唔系去某些地方打滚几年，如果我想退役，亦要喺高水平联赛退役。」皇马射手宾施马早前转投沙特阿拉伯球队伊蒂哈德，却奥斯似乎唔认同呢位前队友嘅选择。

却奥斯续约之後，另1位中场老将莫迪历去留亦受到关注，呢位37岁克罗地亚国脚将於6月底约满，盛传有沙特阿拉伯豪门想签佢，预料佢将於短期之内，同皇马会长皮里兹见面，再决定前途。