早前传出沙特阿拉伯联赛冠军伊蒂哈德计划用5,100万镑(约5.1亿港元)收购热刺前锋孙兴民，并向呢位30岁南韩国脚开出一份2,600万镑(约2.6亿港元)年薪嘅4年合约。「孙仔」终於开腔回应，断然拒绝去中东掘金，并霸气讲明：「钱对我并唔重要。」

南韩喺日前国际热身赛打和萨尔瓦多1比1之後，孙兴民被问到伊蒂哈德出天价人工签佢嘅问题，「孙仔」话：「钱对我并唔重要，踢波带来嘅自豪感，以及喺自己喜欢嘅联赛比赛，先至最重要，我喺英超仲有好多事要做，会留喺热刺踢好波。」

孙兴民仲提到前南韩国脚奇诚庸曾经讲过，南韩队长唔会去踢中超，暗示身为队长嘅佢亦无意去沙特搵食。

另外，孙兴民透露自己近8个月都受到伤患问题困扰，已接受小手术治疗伤势，希望趁抖暑期间，争取恢复100%状态。