近日网上流传一段利物浦更衣室影片，引起球迷热话，片段中有球迷拍低挂起嘅全队球衣，当中绝大部份都系新球季波衫，连新加盟嘅阿历斯麦亚里士打亦有份。不过，已宣布离队嘅阿历士张伯伦、罗拔图法明奴同占士米拿就仍然挂上旧球衣，仲有另外3位球星都未有更换新战衣，令人怀疑佢哋「冇得留低」。

片段中大部份球员都挂起23/24球季波衫，早前宣布离队嘅4名球员当中，除拿比基达冇份出现外，阿历士张伯伦、罗拔图法明奴同占士米拿都有旧波衫出现，但其余球员当中仲有3个「未换衫」，包括堤亚高艾简达拿、祖高美斯同祖尔麦迪比，令球迷怀疑佢哋都唔喺组军计划当中。

据报利物浦收购阿历斯麦亚里士打後，仍希望签入多2名中场，中坚方面亦系领队高普想增兵位置，所以亦唔排除会再有球员离队。有利物浦球迷就认为3位「未换衫」球员，可能只系印刷问题，或者准备更换球衣号码，未必同去留有关。