新季外籍领队比率破纪录 狂牛势力英超最恶
英超大量引入外国球星唔系咩新鲜事,不过新一季将会出现另一新景象,20队只得4个英格兰本土领队,比率系英超史上最低(20%)!相反由曼城领队哥迪奥拿掀起嘅「狂牛旋风」横扫英超,2023/24球季英超竟然有5队系由西班牙领队「揸旗」,压倒本土帮成为英超领队最大势力。新一季英超百花齐放,除西班牙(5人)、英格兰(4人)同威尔斯(2人)之外,仲有9个嚟自五湖四海嘅领队(见表)。回顾英超历来领队文化,唔同地域嘅领队都喺英超留下烙印,令英超更多姿彩。
●西班牙传控派横行受追捧
英超球队由传统英式踢法转型到欧陆控球战术,西班牙领队居功不少。自2004年宾尼迪斯执教利物浦开始,英超每年都有至少1个西班牙领队任教。肥宾曾帮利物浦赢欧联冠军、为车路士赢欧霸冠军,马天尼斯执教韦根同爱华顿亦得到唔少好评,亦有桑迪拉莫斯执教热刺嘅失败例子,但无损英超对西班牙教头愈嚟愈炽热嘅追求。
师徒争冠+艾美利引爆热潮
2016年哥迪奥拿顶住「世界最佳」名衔登陆曼城,5次赢得英超打造出「蓝月王朝」,同时将呢股西班牙风推上高峰。阿仙奴2019年委任哥迪奥拿嘅「徒弟」阿迪达执教,上季已成为曼城最大挑战者,呢对西班牙师徒对决成为英超焦点;前阿仙奴领队艾美利上季重返英超,令阿士东维拉脱胎换骨兼打入欧洲赛,同样令人期待。狼队上季中请到前西班牙国家队主帅卢比迪古领军,加上般尼茅夫上月聘请西甲少帅伊拉奥拿上任,相信呢股狂牛旋风嘅威力将有增无减。
●法国革命无以为继
英超成立初期教坛比较排外,云格初来甫到时,甚至畀报章大字标题以「谁」来讽刺,幸好这名法国「教授」有料到,自1996年赴英伦後,执教阿仙奴足足22年,3夺英超冠军及7捧英足盃,包括2004年联赛全季不败,佢签入多名法国球员,例如韦拉、亨利、皮利斯等大获好评,同时打开咗「外教」闯英超嘅大门,尤其系法籍领队,都因着云格有口皆碑而获英超列强邀请。
除云格侯利亚外冇个掂
不过呢场「法国革命」无以为继,除咗已故教头侯利亚2001年率领利物浦荣膺5冠王,取得短暂成功外,之後亦未能复兴红军,2010年佢重返英超接掌阿士东维拉,可惜一季後因健康理由请辞。其余都冇个掂,其中韦拉踏入2023年,各项赛事领军共12仗未赢过,令水晶宫一度陷入降班漩涡,最终佢喺3月中被炒,反而及时止跌护级成功,好明显未够班。
●「葡友」冇个做得长
一讲到英超嘅葡萄牙籍领队,第一个谂起嘅一定系摩连奴,呢位世界级名帅纵横欧洲足坛20多年,捧盃无数,喺英超就教过车路士、曼联同热刺,佢嘅成功亦令多位葡籍教练到英超搵食,包括保亚斯、纽奴、般奴拿治、马高施华等,然而呢班「葡友」有个共同特点,就系冇个做得长。
寸王4次教英超皆被炒
先讲最成功嘅摩连奴,佢叫「寸王」或「摩dad」,赢过3次英超冠军,但仲有个花名叫「违约金猎人」,喺英超4个时期执教3队都系被炒收场,保亚斯喺车路士同热刺都系短暂执教,纽奴喺热刺任期更少於3个月,般奴拿治喺狼队、马高施华执教爱华顿都有同样经历。
●费Sir国王撑起苏格兰帮
苏格兰势力喺英超成立初期举足轻重,最成功嘅毫无疑问系曼联传奇领队费格逊,除咗两夺欧联外,单计英超佢曾征战过20季,并且13度捧走冠军奖盃,其中两次缔造3连霸,两项都系英超纪录,为红魔一统天下奠定基石,地位超然,而费Sir喺2013年钦点嘅接班人兼同乡莫耶斯,虽然接手曼联惨淡收场,但佢喺2005年协助爱华顿取得欧联入场券,以及上季率领韦斯咸勇夺欧协联锦标,绝不简单。
莫耶斯格拉咸都有盃捧
作为费Sir其中一位死对头,「国王」杜格利殊不但在英超成立前嘅英甲时期,带领利物浦横扫英伦,之後转教布力般流浪,更喺1995年煞科日力压曼联封王,成为英超成立头5季,唯一打破红魔连霸局面嘅球队,唔讲得笑。另一位苏格兰教头格拉咸,尽管未赢过英超冠军,但1993年佢协助阿仙奴捧走英联盃同英足盃,成为首支国内盃赛双料冠军嘅球队,翌年更首夺欧洲盃赛冠军盃,之後辗转叛投北伦敦死敌热刺,亦喺1999年成功染指英联盃。
●意大利籍教头冠军保证
意大利籍领队多年来喺英超建立「冠军主帅」招牌,至今已经有4人协助所属球队捧英超冠军,当中最经典一定系文仙尼於2011/12年球季率领曼城最後一刻赢波,凭较多净得球力压同分曼联,令「蓝月亮」相隔44年再尝顶级联赛冠军滋味。至於云尼亚里亦不遑多让,协助李斯特城创造奇迹,夺得2015/16年球季英超冠军。
车仔最爱意国主帅
值得一提,意国主帅非常旺车路士,安察洛堤、干地都帮车仔捧过英超冠军,迪马堤奥执教下赢过欧联及英足盃冠军,至於维埃里领军时期亦夺得英足盃及英联盃等锦标。此外,现时白礼顿领队迪萨比带领球队创出佳绩,备受好评。
●德国系逼抢由高普响名堂
自从哥迪奥拿嘅控传踢法近年雄霸英超,唯一能够同佢抗衡嘅,就系两位德国籍主帅高普同杜曹嘅「高位逼抢」,一种源自德国「逼抢之父」兰历克提倡嘅打法。德国领队过去在英超唔算成功,马加夫嘅富咸、法基嘅诺域治都未有留下痕迹,直至高普2015年入主利物浦,佢嘅踢法同对球队嘅改造,改变咗英超格局。
2019/20破哥帅传控垄断
虽然曼城近6年5夺英超,但如果细心留意,佢哋2019至20年失冠嗰季,就系由利物浦夺冠,再睇2018至19年同2021至22年两季,利物浦都只系仅输1分畀曼城。至於杜曹带领嘅车路士,除咗每年都顺利打入前4,仲喺2020至21年欧联决赛「英超打吡」击败曼城封王。至於曾短暂执教曼联嘅兰历克,虽算系高普同杜曹嘅启蒙,但成绩反而唔及两位「徒弟」。
●荷兰帮冇成绩名帅一样颓
荷兰籍领队喺英超历史上,并唔算成功,强如2大经典名帅尹戈尔、希丁克都只系短暂过客。其中尹戈尔2014至16年执教曼联两季,仅获得1次英足盃冠军,被球会炒鱿。至於希丁克因为同前车路士班主阿布拉莫域私交甚笃,曾经临危受命,做过2次车路士看守领队,同样捧过1次英足盃冠军。
古列治球员兼领队超经典
另外,古列治亦试过以球员兼领队身份为车路士捧1997年英足盃冠军,至於祖尔执教热刺、法兰迪保亚执教水晶宫,成绩都系差强人意,法兰迪保亚更加仅教10星期就被炒。现时曼联主帅坦哈格上季帮球队捧英联盃及重夺欧联入场券,已经算交到功课。
●本土派唔掂累埋英军
荷杜、鹤臣、艾拿戴斯同修夫基都有个共通点,就系执教完英超球队後成为英格兰领队,不过唔代表佢哋英超成绩好好,修夫基更加带到米杜士堡降班被炒,本土派领队喺英超成功例子寥寥可数,从未有英格兰领队赢过英超,最後一个赢得顶级联赛嘅,已经系1991/92年列斯联嘅韦坚逊,正正就系英甲之末,英超之始嘅交接。英国曾经有报道分析,自英超商业化变成金蛋,联赛再唔能够成为英格兰领队练兵之地,「即食文化」兴起,不论球员及领队都再无时间空间,青训球员及本土後生领队都唔可以满足球会要求。
艾迪侯域被睇好破闷局
英格兰领队只剩余以务实主义、功利足球嘅老一辈「护级专家」可以喺英超搵到空间,最简单例子,由白礼顿转教车路士嘅朴达,本来被寄予厚望,带领车仔冲击锦标,但半年後就被炒。展望嚟紧一季4名本土派英超领队,最有机会打破其他国家垄断嘅,系纽卡素嘅艾迪侯域,佢上季曾经带领「喜鹊」杀入英联盃决赛,同冠军无限接近,惜最终不敌曼联,不过喺中东资金支持下,艾迪侯域有机会为英格兰籍领队争一口气,成为首位夺得英超嘅本土派。
- 07-08巴塞斟掂18岁巴西射手 做罗拔佬接班人
- 07-08【官宣】艾斯派古达落车 喊足6分钟
- 07-08【官宣】皇马天价签18岁天才 巴塞争输兼受辱
- 07-08新季外籍领队比率破纪录 狂牛势力英超最恶
- 07-06【官宣】安历基同PSG签约2年 麦巴比去留将揭晓
- 07-06转会大神爆料:安察洛堤明年6月教巴西
- 07-04迈亚密证实斟苏亚雷斯 再拍美斯经典重现!
- 07-04国际迈亚密斟掂拉莫斯 同美斯再相逢