约满诺定咸森林回复自由身嘅连格，暂时未定去向，日前佢出po发布自己操练同健身片段，有报道指佢可能去美职发展，另边厢，华盛顿联队主帅兼旧队友朗尼近日表示，美职有条赚钱财路，可以搵连格合作。

虽然未有班落，但连格已经自己开操，拍住佢一齐嘅系效力华盛顿联队嘅旧曼联队友拉夫摩利臣，亦因为拉夫摩利臣嘅关系，连格有机会去美职发展，跟朗尼搵食。

原来朗尼都有谂过搵连格合作，佢近日接受《泰晤士报》访问，坦言自己去年曾经将连格名字加入球队嘅「发现名单」，此举可以为球队带来收入。

朗尼解释指：「美职规定，每队嘅『发现名单』最多可以填7名球员，去年我填咗连格落去，假如有美职球队签入连格，华盛顿联队就可以收取一定收费，原因系我『发现』咗连格。」