阿仙奴今夏豪花超过2亿镑(约20.46亿港元)买迪格兰赖斯、夏维斯同祖利安添巴後，大军周日(16日)即起程展开美国之旅，一众新兵全部有份上机，不过中场大将汤马士柏迪竟然未喺名单上，有传佢正同沙特阿拉伯球会进行斟介，可能短期内离队。

阿仙奴星期四(20日)朝早会对美职明星队，大军周日起程，啱啱加盟嘅迪格兰赖斯同祖利安添巴都赶得切出发，但亦有多人榜上无名，上季被外借嘅森比卢干加、尼高拉斯比比、薛迪索拉斯同纽奴泰华利斯落选唔令人意外，但汤马士柏迪竟然同踢完U21欧国盃嘅伊美路维一齐被列入「预计1星期後归队」，就引嚟转会猜测。

汤马士柏迪上场对纽伦堡嘅热身赛有份上阵，未发现有伤患问题，反而有传沙特阿拉伯球会正重金邀请佢加盟，尤其迪格兰赖斯加盟後，汤马士柏迪嘅正选位置势必被抢走，消息指阿仙奴将要求4,000万镑(约4亿港元)转会费先会考虑放人。