周一(17日)朝早美洲金盃决赛，墨西哥凭辛迪亚高基文尼斯88分钟绝杀，1比0击败巴拿马勇夺冠军。今次系墨西哥相隔4年重夺冠军，亦系佢哋历来第9次封王，抛离7次捧盃嘅美国称霸中北美洲。

墨西哥今场踢得主动，单系上半场就有14次射门，不过面对防守组织严密嘅巴拿马束手无策。墨西哥喺85分钟换入22岁新星辛迪亚高基文尼斯，呢位效力飞燕诺嘅前锋即刻发威，佢喺中圈拎波後，巧妙避过巴拿马守将再用速度狂爆入禁区射入，成为墨西哥捧盃英雄。

墨西哥赢得冠军後，临时领队查美罗辛奴有望正式坐正，呢位2年前带领墨西哥奥运队拎到男足铜牌，据闻日内将会同墨西哥足总会长见面，商讨合约细节，门将奥祖亚赛後亦支持查美罗辛奴继续带队：「由佢第1日执教，就令每个球员发挥最好水准，踢出自己个性，查美罗辛奴深明墨西哥足球嘅意义。」