千呼万唤！阿根廷「球王」美斯周一(17日)朝早喺国际迈亚密隆重登场，呢次盛大发布会一度被雷雨阻碍，令美斯亮相时间推迟，不过最终都喺班主碧咸亲自介绍下出场，美斯带埋老婆同3个细路一齐亮相，正式展开球王嘅美国之旅。

碧咸介绍美斯出场嗰阵话：「好多谢大家一齐嚟庆祝呢个神奇时刻，呢一刻会被全世界注视，一个真正伟大球员加入我哋家庭，原谅我依家有啲情绪激动，因为我嘅梦想成真，欢迎美斯加盟国际迈亚密！」由於当时仍然落住雨，另一班主马斯更讲笑话：「我哋用『圣水』欢迎美斯出场！」

拎住国际迈亚密件粉红10号波衫嘅美斯表示：「多谢大家！首先我好多谢大家嘅热情，好开心喺度同大家一齐，多谢碧咸同马斯嘅悉心安排，我已经急不及待要练波同比赛。我渴望胜利，我想帮助球队成长，好开心同家人拣咗呢个城市，我好肯定我哋会有一段美好时光。」

今次美斯亮相典礼非常盛大，有歌星表演亦有史提芬居里、布雷迪等美国体坛巨星拍片欢迎，美斯嘅阿根廷好兄弟阿古路亦系座上客。国际迈亚密今次除咗介绍美斯之外，另一巴塞隆拿名将布斯基斯亦喺典礼中首度亮相。